Heimsókn aðalframkvæmdastjóra UNESCO Irinu Bokovu til Íslands 24. til 27. maí 2014

23/05/2014

Fréttir

Aðalframkvæmdastjóri UNESCO, Irina Bokova, kemur til landsins laugardaginn 24. maí í boði utanríkisráðherra og mennta- og menningarmálaráðherra og dvelst hér á landi fram á þriðjudagsmorgun 27. maí.

Í heimsókn sinni mun aðalframkvæmdastjórinn hitta að máli Illuga Gunnarsson mennta- og menningarmálaráðherra, Gunnar Braga Sveinsson utanríkisráðherra og sitja boð forseta Íslands að Bessastöðum.

 

Irina-Bokova

Bokova mun heimsækja Þingvelli sem eru á heimsminjaskrá UNESCO, kynna sér handritasafn Árna Magnússonar sem er á sérstakri varðveisluskrá UNESCO um minni heimsins og ávarpa  ráðstefnugesti á alþjóðlegri ráðstefnu um máltækni í Hörpu. 

Mánudaginn 26. maí mun Bokova tala á opnum fyrirlestri í Hátíðarsal Háskóla Íslands undir heitinu: Frá tungumáli til þekkingar. Hvernig megnum við að endurnýja hina endanlegu auðlind?Fyrirlesturinn fer fram á ensku, hann er öllum opinn og hefst kl. 16:00. Í fyrirlestri sínum mun Bokova beina sjónum að því áhrifavaldi er felst í hlutverki og umboði UNESCO við nýtingu menningarverðmæta og vísindalegrar þekkingar í þágu varanlegs friðar og sjálfbærrar þróunar.

Ísland gerist aðili að UNESCO í júní 1964 og fer heimsókn Bokovu því fram á 50 ára aðildarafmæli Íslands.